下午二時, 我準時到達一間私營老人院, 如常為各院友覆診。
我坐在老人院大廳正中, 一位叔叔扶着四腳叉, 走到我的身旁坐下。根據記錄, 他已經 89 歳了, 有點認知障礙徵狀, 也有高血壓和糖尿這兩種常見的長者毛病。但他步履相當平穩。
「叔叔, 好精神喎, 你有無乜野唔舒服呀。」我開口問道。
「哈哈, 係啲皮膚好痕囉。」叔叔笑着對我說。
「咁俾我睇吓邊度痕呀。」老友記皮膚痕癢的原因眾多, 最常見是因為油脂分泌不足而皮膚乾燥導致痕癢; 亦可因為濕疹, 敏感, 真菌或細菌感染造成。檢查皮膚是找出原因的第一步。
「係下面痕呀。」叔叔手指着褲襠位置。
「咁要入房睇囉。」很多長者都會有兩邊腹股溝痕癢的問題, 一檢查就會發現皮膚又紅又濕, 這大多是因為真菌感染, 又或大家俗稱的汗癬。處方適當的藥膏, 加上保持皮膚乾爽, 情況會得到明顯的改善。
我跟着叔叔走進他的房間, 職員幫忙叔叔除掉褲子, 並打開他的尿片, 準備讓我檢查。
「咦? 做乜佢要着尿片嘅? 」我突然想起: 「佢行得㗎喎。」
「唉, 佢自己痾成日疴唔切, 痾到周圍到係㗎。。。佢要用尿片㗎。」職員立刻解釋, 好像害怕我會取消叔叔的尿片補助金似的。
「咁佢去痾尿輪盡啲用尿片大家安心啫, 你有無俾佢自己去廁所呀?」
「用咗片咁又無喎。」職員很坦白
「我去大便就去廁所, 痾尿就痾係條片度。」叔叔一臉懵懂對着我說。
想不到習慣了, 叔叔已當「痾落條片度」是一件理所當然的事。
「咁你無以前咁醒目要條片幫吓啫, 你想去痾尿都可以照去痾㗎喎, 唔使依賴哂條片㗎。」我對叔叔說。
叔叔好像顯得有點擔心。
「咁你八十幾年都自己去痾尿㗎啦, 你行得都幾穩陣呀。」我安慰說。
我也知道叔叔全天候戴着尿片, 無時無刻依賴着它, 對老人院職員來說, 是省卻了不小工夫。。。
但習慣成自然, 明明自己有可以做到, 卻慣性依賴尿片, 是否對叔叔最好呢?
要知道尿藏在尿片中, 長期接觸着皮膚, 容易做成真菌感染, 叔叔的皮膚痕癢, 很可能都是因為這個原因。。。
解決叔叔當前的皮膚問題, 尚且容易; 要令情況不會再出現, 相信就要靠職員的配合, 叔叔的努力和我們醫護人員的提醒了。
Search